Поддршка на корисниците на складиштата
Освен персоналот, кој е директно одговорен за складиштето, треба да размислите за потребите од обука на корисниците во вашата институција. Првично, ова ќе се однесува на обука на оние вработени за кои постои веројатност дека ќе депонираат, но можеби сакате да размислите да обезбедите обука и за оние кои ќе бидат корисници на материјалот во вашето складиште.
Обуката на членовите на персоналот кои би депонирале материјал може лесно да се вметне во промоцијата за користење на складиштата. Ако обуката е што е можно поедноставна, ќе помогне да се охрабри депонирањето, бидејќи повеќето системи имаат интерфејс за депонирање, кои се доволно интуитивни за повеќето академици. Колку обука сакате да им обезбедите на академиците кои ќе депонираат материјал, исто така зависи од тоа дали сте се одлучиле за самоархивирање или за депонирање со посредување.
Како што системите сè повеќе се приближуваат до решенија за депонирање со „еден клик“, можеби е добро да не се привлече вниманието кон екстра напорите потребни да се депонира материјал за тоа да биде цела една обука, бидејќи тоа може да ги обесхрабри научниците. Бидете сигурни дека тие знаат како и каде да побараат поддршка ако им притреба.
Повеќето корисници на материјалите во вашето складиште веројатно нема да бидат од вашата институција и многу од вашите студенти и научници кои наоѓаат материјал во складиштето ќе најдат содржина преку машина за пребарување или можеби каталог на библиотека, ако притоа се пребарува и низ складиштето. Сепак, можеби ќе сакате да размислите да опфатите теми кои се однесуваат на отворениот пристап и постоењето складиште при запознавањето на новите студенти и новите вработени со библиотеката. Исто така, може да ја искористите оваа пригода и да им покажете како да пребаруваат низ складиштето.
Услуги за поддршка
Контакт-деталите за поддршка треба либерално да бидат распространети на веб-страницата на вашето складиште. Треба барем да обезбедите имејл-адреси за генеричка поддршка и телефонски броеви за помош и кога е можно и контакт-имиња за пружање поддршка. Секогаш треба да има некој достапен да одговара на прашања, што е можно побрзо. Идеално треба да има повеќе од едно лице да одговара на прашања, дури и ако едно лице само ги прима пораките за главниот контакт за време на периоди на голем обем на работа или отсуство.
Веројатно ќе добиете барања за општ совет за условите за депонирање, кои треба да ги исполнуваат лицата и материјалот и за постоење институционални мандати и политики. Исто така, веројатно ќе добиете барања за практични совети за регистрација, префрлање во ПДФ и за депонирање. Сиве овие теми може веќе да бидат опфатени од страна на вашите онлајн-водичи или кај најчесто поставените прашања. Во тој случај, директни барања можеби се индикатор на недостиг од јасност и затоа треба постојано да ги ревидирате вашите онлајн-документи во насока на прашањата.
